13659-1
Nu kò beja lyuku pļést,
Moza lìpu atlaseite;
Par kù beja naudu dút,
Moza cìma dzaltoneite.

33592-2
Kò tej meiteņa
Dzàltoním motím?
Vagara meiteņa
Dzàltoním motím.
Steìdzís, puìşeit,
Byus jej tova.
-Man taida puişeiša
Voti navajaga,
Maņ pošai staļļeitî
Sèrms kumeļeņš,
Tù jiudžu, tù brauču,
Tù dancynòju,
Tam devu auzeņu
Paşejódama,
Tam nešu iudeņa
Solt'ulúteņa,
Tam taìsu tiļteņu
Nu rùžu lopu.
Ti brauça kundzeņi,
Ti stòrosteņi,
Tì muni bòļeņi
Maršeņas veda,
Tur meta cimdeņus,
Tur ņèzdauçeņus.

5032-3
Svàta Mòra tèrgâ gòja,
Manis ļeìdza aicynòja.
Şev apşéja zalta jústu,
Maņ apşéja sudabreņa.
Tai saçèja apséjuşe:
Nosoi gudri, bòriņeit!
Kai izdzèrdu tús vòrdeņus,
Maņ pabyra asareņas.-
- Pavaìcòju uz Mòreņu:
Kur mozgót zeìžauteņu?
- Deveņôs upeitês,
Dasmytâ azarâ.
- Pavaìcòju uz Mòreņu:
Kur kaļtét zeìžauteņu?
- Deveņôs ļìpeņôs,
Dasmytâ úzulâ.
- Pavaìcòju uz Mòreņu:
Kur ruļļét zeìžauteņu?
- Zam bazņeicas zalta ruļļes,
Tí ruļļét zeìžauteņu.
- Pavaìcòju uz Mòreņu:
Kur nùlikt zeìžauteņu?
- Lìc pyùreņa dybynâ,
Myužam bàdas naredzési.

20680-0
Var pazeìt tù Jòneiti
Bogotù saiminìku:
Lobi svòrki mugorâ,
Naudas moki ozútî.

4823-5
Nasasmèju bòriņam,
Ar māmeņu dzeivódama;
Saùļe kolna neaptak,
Jau es pote bòrineite.

13234-17
Oì, Dìveņ, kù darèt?
Sokós mani dzáròjs jimt.
Kòršu sovu vaiņuceņu
Smolku lozdu kriùmeņâ,
Laizšu sovu gredzineņu
Dziļu upju dybynâ;
Laizšús pate upeitê
Raudiveišu puļceņâ.
Lobók upes raudiveite,
Na dzáròja ļaùdaveņa!
Dzáròjeņa ļaùdaveņa
Nikod skaiški nastaìgòj,
Visi jòs skaistumeņi
Krùga golda gaļeņâ,
Krùga golda gaļeņâ,
Krùdzinìka rùceņâ.

5775-1
Aiz Daugovas úzuļeņi
Rìpeitê saauguši;
Maņ pa vydu staìgòjút,
Zori róve vaiņuceņu.

13250-7
Izalaižu garu çeļu
Nasukótu kumèļeņu,
Grìžu çeļa maļeņâ,
Lai sukòja žagareņi.
Iztrauçèju cìma suni,
Iztak cìma dzaltòņeites.
Divi mani pati veda,
Treša munu kumèļeņu.
Ìvad pati ustobâ,
Paceļ Dìva mìlasteņu,
Lìk maņ ést, lìk maņ dzert,
Lìk maņ Dìvu pìmiņét.
Gona éžu, gona dzéru,
Gona Dìvu pìmiņèju.
Nùsavèru guládams,
Kù tós dora cìma meitas.
Vína auda, ùtra šyva,
Trešà roksta zeìžauteņu.
Ka nadúsit tós meiteņas,
Kura roksta zeìžauteņu,
Es nùmeršu bédeņâ.
Kur jiùs mani globósit,
Meitu bàdu nùmyrušu?
Apeiņéšu dòrzeņâ
Zam lúdzeņa kammbara.
Tí izauga ļela rùža
Deveņim zareņim.
Cik reiteņa jaunas meitas
Ít uz dòrzu puškótús.
Raunit, meitas, kù raunit,
Rùžai golvas naraunit,
Tei nabeja rùžas golva,
Tei bej dòrga dvèşeļeite.

11195-0
Erbe tak pa ceļeņu,
Cakuļeņu grùzeidama,
Mani jaunu kairinòja,
Lai es jamu ļaùdaveņu.

13352-0
Bédžu, bédžu nu tauteņu,
Kritu lozdu kriùmenî.
Tev, lazdeņ, plotas lopas,
Apsedz munu augumeņu.